Loiumat enpresa Incorpora programarekin lankidetzan ari da langileen bilaketan, eta bere konpromiso soziala indartzen du

Joseba, Loiumateko CEOa, Jesus bazkidearekin batera.

2008an, logistikaren sektorean 25 urte baino gehiagoko esperientzia zuen Joseba Pérezek, Jesus bazkidearekin batera, Loiumat sortzea erabaki zuen: Trapagan eta Derion biltegiak, erakusketa-gune bat eta Derion dagoen denda batzen dituen proiektua.

Prestatutako langileak aurkitzeko zailtasunak izan zituztenez, Incorpora programaren enpresa laguntzaileen sareari atxikitzea erabaki zuten, eta, horrela, gizarte-bazterkeria jasateko arriskuan zeuden pertsonak kontratatuz, euren gizarte-konpromisoa sustatu zuten. Siderurgia Integraleko Langileen Fundazioaren bidez egin zuten. Sinergiak laster lortu zituen lehen emaitzak, eta lehen aldiz sartu zen lanean enpresan Incorpora erabiltzaile bat.

“Incorpora programa bezalako laneratzeko programak behar ditugu”

“Zailtasun handiak ditugu enpresarentzat egokiak diren langileak aurkitzeko, eta, beraz, laneratzeko programak behar ditugu, lan bila ari diren pertsonak eta enpresen sarea konektatuko dituen Incorpora programa, adibidez”, esan du Joseba enpresako CEOak.

Siderurgia Integraleko Langileen Fundazioaren bidez programarekin lankidetzan hasi eta urtebetera, eta Incorpora programaren bidez pertsona bat kontratatu ondoren, Josebak bai langileen aukeraketarekin lortutako emaitzen bai programako teknikariekin duen komunikazioaren oso balorazio positiboa egin du: “Gure arteko komunikazioa funtsezko elementua da harreman ona ezartzeko”.

“Hasieratik egon dira prest eta gure beharrei adi, eta, horri esker, aurkeztu dizkiguten hautagaiak ezin hobeto egokitu dira bilatzen ari ginen profilera. Profil profesionala ez ezik, alderdi pertsonalak ere kontuan hartu dituzte; proaktibitatea eta lanerako gogoa duten pertsonak izateari garrantzi handia ematen diogu”, adierazi du Josebak.

Loiumateko CEOak Incorpora programatik nabarmentzen duen beste alderdietako bat langileen bilaketan eta jarraipenean jaso duten laguntza da. Kasu horietan, Incorpora profesionalen jarduera-protokoloa hau da: alde batetik, hautagaiak (programaren erabiltzaileak) behar bezala orientatzea, eta, bestetik, haiekin batera egotea eta enpresan jarraipena egitea, kontratatzen badituzte.

Loiumatek bat egin du Incorpora programako enpresa laguntzaileen sarearekin

Amaitzeko, Josebak ez du zalantzarik Incorpora programa beste enpresa batzuei gomendatzeko, oso tresna baliagarria baita bai langileak kontratatzeko, bai gizarte-erantzukizun korporatiboko politikak sustatzeko, gizarte-bazterkeria jasateko arriskuan dauden pertsonei enplegua lortzea errazten baitiete. “Loiumatetik Incorpora programa erabiltzen jarraituko dugu etorkizunean”.

Loiumat, Incorpora Euskadi Taldearekin lankidetzan aritzen diren 3.487 enpresetako bat da, bere konpromiso soziala erakutsiz eta enpresa sareak kolektibo kalteberentzat duen garrantzia nabarmenduz.