O emprendemento de Hylene ao carón de Autoemprego Incorpora: produtos artesanais con sabor venezolano

Hylene en La Flor de Vigo, a panadaría-cafetaría que acaba de estrear.

Descubrimos a historia de Hylene, unha persoa migrante que chegou a España buscando unha oportunidade laboral e que, co apoio de Autoemprego Incorpora, logrou transformar ese desexo nun proxecto de emprendemento.

As persoas migrantes moitas veces chegan a un país novo cargadas de ilusións, ideas e gana de traballar. Este é o caso da nosa protagonista, Hylene, unha venezolana que chegou a España co firme propósito de encamiñar a súa vida laboral e mellorar a súa calidade de vida e a da súa familia.

Con este obxectivo en mente, Hylene empezou a explorar saídas profesionais e, neste proceso, coñeceu o programa Incorpora a través da entidade Fundación Érguete–Integración. Alí, o equipo de profesionais Incorpora, considerando a súa experiencia, preferencias e aptitudes, deseñou para ela un itinerario sociolaboral enfocado en lograr a inserción no mercado laboral de Vigo que empezaba cunha fase de formación. Así, Hylene e as súa técnicas elixiron o curso de Pick & Pack e reposición en almacéns, impartido pola mesma entidade do Grupo Incorpora Galicia.

Esta formación, como todas as impulsadas polo proxecto de inserción laboral da Fundación ”la Caixa”, foi deseñada tras un proceso de prospección realizado polos profesionais Incorpora para identificar as necesidades de persoal nas empresas da zona. Esta metodoloxía reduce a fenda entre as persoas que se están formando e as vacantes dispoñibles, de forma que se incrementan as posibilidades de inserción laboral para colectivos vulnerables e, á vez, axúdase ás empresas a potenciar as súas políticas de responsabilidade social corporativa mediante estas contratacións.

Unha charla sobre emprendemento e Autoemprego Incorpora: a semente do negocio de Hylene

Como parte da súa formación, Hylene e o resto do alumnado asistiron a unha charla sobre emprendemento, unha iniciativa que demostra como as formacións Incorpora transcenden máis aló da formación teórico-práctica e ofrecen outros recursos a persoas en risco de exclusión social.

María Esteban, responsable dos cursos Incorpora de Fundación Érguete-Integración, resúmeo así: “Trabállanse competencias transversais, entre as que se inclúen os obradoiros de autoemprego. Estes obradoiros serven para que as persoas que contemplan esta opción ou necesitan este tipo de recursos saiban que, por exemplo, dende o programa Incorpora ofrecemos ese asesoramento para emprender un traballo por conta propia”.

Tanto María como Marta Alonso, técnica de Autoemprego Incorpora en Fundación Érguete-Integración, coinciden en que Hylene amosou dende o primeiro día aptitudes e interese en emprender: “Foi unha das persoas que, ao longo deses obradoiros, se mostrou interesada en buscar orientación neste campo”, comenta María. Pola súa parte, Marta reflexiona sobre a importancia do traballo colaborativo dentro do programa Incorpora: “O caso de Hylene é unha mostra perfecta das sinerxías que se xeran entre as diferentes liñas de actuación do programa”.

A charla sobre emprendemento tivo tal impacto en Hylene que decontado foi derivada a Autoemprego Incorpora para comezar a dar forma ao seu negocio. Ademais, non era a súa primeira vez como muller emprendedora: en Venezuela xa xestionara con éxito un restaurante. Agora, así e todo, descoñecía os trámites e procesos que debía seguir para volver emprender en España, e ademais quería centrarse noutro sector da restauración: unha panadaría-cafetaría degustación onde ofrecer produtos venezolanos como arepas, cachitos ou empanadas.

“Encaixaba perfectamente na idea de negocio que quería poñer en marcha Hylene”

As profesionais de Autoemprego Incorpora comentan que con Hylene todo o proceso fluíu de maneira moi natural. Dende as primeiras reunións, Marta, a responsable dos cursos Incorpora, identificou o perfil emprendedor da venezolana. Xuntas definiron a súa idea de negocio de forma fácil e clara e, como din as profesionais Incorpora, “unha desas oportunidades difíciles de desaproveitar” fixo o resto.

A oportunidade chegou da man doutra muller emprendedora que, tras ser asesorada no mesmo Punto Autoemprego Incorpora de Fundación Érguete-Integración, contactou con Marta para comentarlle que quería traspasar a súa panadaría-cafetaría. “Encaixaba perfectamente na idea de negocio que quería poñer en marcha Hylene”, lembra Marta.

Aínda que ao principio a noticia colleu un pouco desprevida a Hylene pola rapidez dos acontecementos, xa que aínda estaba inmersa no curso do programa Incorpora e nas prácticas non laborais, en poucos días puxéronse mans á obra. Primeiro, estudaron a viabilidade do proxecto e elaboraron un plan de empresa. Así o recorda a moza venezolana: “Todo foi moi rápido. Marta axudoume a encamiñar as ideas que eu tiña e avisoume de que traspasaban este negocio. Fun, mireino, gustoume… e empezamos co proceso”.

Hoxe, tras catro meses dende a súa apertura, La Flor de Vigo parece ter un futuro prometedor e un moi bo recibimento por parte dos clientes da zona. “Moi bo servizo”, “excelente calidade de produtos” ou “ambiente tranquilo e limpo”, din algúns dos comentarios que se poden atopar en Internet sobre o negocio. Hylene, pola súa parte, resalta a importancia de comprometerse co traballo para ter un negocio de éxito: “Tes que lle poñer moito corazón para que as cousas saian ben e lograr así clientes fieis que volvan mercar”, afirma ilusionada con este novo capítulo laboral.

“O programa Incorpora suma”

A emprendedora non quere deixar pasar a oportunidade para mostrar o seu agradecemento ao programa Incorpora polo asesoramento e a orientación recibidos no seu camiño cara ao emprendemento: “O Punto de Autoemprego Incorpora deume moitas cousas positivas. Axudoume a facer algo que me gusta: estar na cociña, ter un pouco máis de tempo para o meu fillo e a miña familia e ser máis independente”.

Botando a vista atrás, Hylene, non só se sente satisfeita, senón que asegura que o programa Incorpora superou as súas expectativas: “Recoméndoo ao 100 %”, afirma. A isto engade: “O programa Incorpora suma, suma moitísimo, tanto se é para dar forma á túa idea como para lograr un emprego, facer un curso que che gusta, emprender… algo que non vas facer a cegas. Sempre vas a ter unha guía, como un piar ou un bastón que che vai axudar a progresar, encamiñarte, estudar e planificar o teu negocio”.

No que vai de ano, os Puntos de Autoemprego en Galicia axudaron á creación de 32 empresas.