Un grupo de 22 participantes do programa Reincorpora impulsa unha campaña de sensibilización sobre os riscos do alcohol

Jenifer Dios e Saray Fernández, técnicas do programa Reincorpora, xunto a varios participantes do programa Reincorpora, durante un dos actos da campaña de concienciación.

O programa Reincorpora é unha iniciativa impulsada pola Fundación ”la Caixa” en colaboración co Ministerio do Interior que, a través da Entidade Estatal Traballo Penal e Formación para o Emprego, desenvolve itinerarios personalizados de inserción sociolaboral con persoas privadas de liberdade.

Neste marco, un grupo de 22 persoas privadas de liberdade do Centro Penal A Lama e do Centro de Inserción Social (CIS) Carmen Avendaño de Vigo, coordinadas pola Fundación Érguete-Integración, creou unha campaña de sensibilización sobre o consumo de alcohol. A iniciativa busca sensibilizar mozos e colectivos vulnerables sobre os riscos asociados ao alcohol, combinando formación, obradoiros creativos e pezas audiovisuais que reflicten as experiencias reais dos participantes.

Transformando experiencias pasadas nunha campaña de sensibilización

A campaña presentouse en centros penais e ante o alumnado de formación profesional básica e do ciclo superior de Integración Social, co obxectivo de sensibilizar sobre os efectos do alcohol en colectivos vulnerables. Este enfoque permite que a campaña conecte directamente coa realidade de quen a recibe, mostrando historias reais e aprendizaxes persoais.

Baixo o lema “O erro foi meu. A elección é túa” e os cancelos #OMeuErroATúaElección #DecideSenAlcohol, a campaña inclúe cinco vídeos curtos e un vídeo principal que reflicte como un consumo social pode derivar en dependencia, enfermidade e exclusión. 

Un dos participantes comparte a súa experiencia: “O alcohol cambioume. Atraíame moito máis o alcohol que outras drogas. Cando consumía, non pensaba con claridade, non distinguía o ben do mal e era moi agresivo; iso tróuxome moitos problemas”. Estas historias proporcionan autenticidade e forza á mensaxe da campaña e fana próxima e real para quen a ve.

Formación e reflexión para impulsar a reinserción sociolaboral

Antes de deseñar a campaña, os grupos participantes do CIS e do centro penal asistiron a varias sesións formativas da man das técnicas do programa Reincorpora, nas que se abordaron os efectos do alcohol sobre a saúde, a conduta, as relacións sociais e o desempeño laboral. 

Ademais, os participantes tamén avaliaron varias campañas institucionais de prevención e debateron sobre a normalización do consumo de alcohol na nosa cultura. Este proceso fomentou a reflexión individual e colectiva e levou a algúns internos a recoñecer o papel do alcohol nas súa vidas. Un deles lembra: “Custoume moito deixalo, o mono do alcohol é horrible. Tiña frío, atopábame moi mal, non tiña gana de facer nada, estaba moi abafado. O mono paseino só na miña cela. Axudoume moito ler libros”.

Outro participante destaca a dimensión educativa da campaña: “Quero educar os meus fillos para que, se consumen alcohol, o fagan de forma adecuada. Falarlles sobre o tema e ensinarlles as consecuencias”, comenta.

Grazas a estas reflexións e ao traballo en grupo, esta campaña de sensibilización converteuse nunha ferramenta de reinserción sociolaboral que conecta coa realidade dos participantes e cos colectivos aos que se pretende sensibilizar.

O programa Reincorpora: aprendizaxe e reflexión para impulsar a reinserción sociolaboral

O traballo desenvolvido antes, durante e despois da campaña permitiu aos internos fortalecer a súa participación social, o que demostra que a reinserción sociolaboral tamén implica contribuír ao ben común e colaborar na comunidade.

Grazas a esta iniciativa, foméntanse procesos de cambio persoal e colectivo mediante o traballo grupal e o servizo á comunidade, fortalécense os itinerarios de inserción sociolaboral dos participantes e déixase un impacto positivo na sociedade.

A través desta actividade, o programa Reincorpora e os centros penais de Pontevedra reforzan o seu compromiso coa prevención do consumo de substancias e co traballo educativo en contextos de privación de liberdade.