Participantes de Reincorpora en Galicia reforzan os seus coñecementos financeiros con Voluntariado CaixaBank

Pablo e Saleta, voluntarios de CaixaBank, fronte ao Centro Penal de Pereiro de Aguiar (Ourense).

Durante maio de 2026, dúas persoas voluntarias de CaixaBank impartiron un ciclo de formación sobre educación financeira dirixido a quince persoas privadas de liberdade do Centro Penal de Pereiro de Aguiar (Ourense), participantes do programa Reincorpora. Esta actuación, promovida por APES – Asociación para a Prevención e a Educación Social, en colaboración cos profesionais penais vinculados ao programa, permitiu achegar coñecementos prácticos sobre xestión económica a persoas que se preparan para afrontar o seu regreso á sociedade.

Esta acción realizouse no marco do programa Reincorpora, unha iniciativa impulsada pola Fundación ”la Caixa” en colaboración co Ministerio do Interior que, a través da Entidade Estatal Traballo Penal e Formación para o Emprego, desenvolve itinerarios personalizados de inserción sociolaboral para persoas privadas de liberdade.

Educación financeira para reforzar a autonomía económica

A través de dúas sesións co grupo de participantes en réxime ordinario, abordáronse de forma teórica e práctica distintos aspectos de educación financeira e complementouse así o itinerario persoal e competencial para o emprego que o grupo vén desenvolvendo dende o mes de xaneiro.

A primeira sesión estivo centrada na planificación financeira e o aforro, mentres que a segunda profundou na xestión de contas bancarias, tarxetas e préstamos, co obxectivo de fortalecer tanto os coñecementos financeiros dos participantes como a súa capacidade para tomar decisións responsables de cara á súa futura vida en liberdade.

A actividade levouse a cabo en colaboración con Voluntariado CaixaBank a través dos obradoiros e charlas de educación financeira que ofrece na liña de Educación. Neste contexto, Pablo e Saleta, traballadores e voluntarios de CaixaBank en Ourense, foron os encargados de desprazarse ata o centro penal para impartir ambas sesións. Xunto a eles, tamén participou a técnica Reincorpora da asociación.

Unha experiencia enriquecedora para impulsar a reinserción sociolaboral de persoas privadas de liberdade

Dende a entidade queren agradecer a Pablo e Saleta o seu compromiso, empatía e capacidade para achegar conceptos financeiros a persoas en situación de vulnerabilidade. Ambos explicaron que, malia contaren con experiencia previa en voluntariado, era a primeira vez que desenvolvían unha actividade nun centro penal, algo que cualificaron como moi gratificante e enriquecedor.

Pola súa parte, as persoas participantes coincidiron en que este tipo de accións complementan moi ben os seus itinerarios, xa que permiten abordar e traballar cuestións moi útiles antes de acceder ao réxime de semiliberdade ou alcanzar a liberdade definitiva.

Iniciativas coma esta poñen de manifesto o valor da colaboración entre empresas, entidades sociais e a Administración para xerar oportunidades, desenvolver competencias e acompañar as persoas privadas de liberdade nos seus procesos de inclusión social e laboral. Neste contexto, o programa Reincorpora acompañou durante 2025 a 4.253 persoas privadas de liberdade en todo o territorio, ofrecendo itinerarios personalizados orientados a mellorar as súas competencias, favorecer a súa empregabilidade e facilitar o seu proceso de retorno á sociedade. Estas actuacións reflicten a importancia de sumar esforzos e crear redes de colaboración que contribúan a construír novas oportunidades para as persoas participantes.